مقالات

زريف الطول اللي قرط جوزة الخونة!


عمر النادي..
بتتذكرو زريف الطول اللي كان نجار في القرية ..الغريب اللي لما سكن بالقرية اهل القرية حبوه وكانو يتمنى كل واحد يجوزو بنته ..كان اسمه فلسطيني .. زريف الطول فلسطيني قُحْ والناس بالقرية كانو ينادوه زريف عشان كان طويل وجهماني , وكانت زنودة من قوتهن بتخلع شجرة الجُميز , زريف اختفى سنين طويلة بعد ما قتل اكثر من عشرين صهيوني مثل ما بتعرفو وسمعتو عن بطولته لما هجم الصهاينه عالقرية وقتلو اهلها , وحامت حاوليه قصص كثيرة ,كلكو سمعتو اكيد قصص مختلفه عن اللي عملو زريف الطول ابو زنود بولاد , الناس ظلّت حايره ومحتاسه بقصصه وبطولاته اللي 
بتخلصش,حتى انو كثير ناس فكروه شخصية وهمية , وانو قصصه بتنذكر بس بليالي السمر و بين العيلات لما يسهرو في العليّات , لكن لا ! هاض الزريف فلسطيني حقيقي وكل اهالي فلسطين في الساحل والجبل والمرج والغور بيعرفوه ,وكثير منهم ناس شافوه ومنهم حتى ناس سلّمو عليه , ابو العبد سيدو للشهيد اكرم اللي كان مع الزريف في آخر عملية حلف يمين انو بعد صلاة الجمعة لقاه بالطريق رايح عالقدس يوم ما الفطيسة شارون دنس مسجدها , وعصلاة العصر بنفس اليوم قامت القيامة بفلسطين وقالو انو الانتفاضه الثانية كان وراها زريف الطول .
صحيح انو سنين مرت لا حس ولا خبر عن زريف الفلسطيني , هاي عادته هو هيك طبعة بغيب بغيب وبطِلّ فجأة , إلا ما يجي وقت الارض ما بتحتاجو , ستي سِريّة قالت انو الارض بتناديه , وقالت انو بيجي على ريحة دم الشهدا, حتى انو ام عمر ابو ليلى يوم ما استشهد ابنها عمر اجى الزريف عزّاها , وبشرها انو الارض وعدته تجيب الف عمر, وقاللها انو كل نص شهر تفتح الشباك وتطلّع منو عالقمر وراح تشوف وجه عمر فيه , حتى إم احمد جرار حكت انو شافت زريف لما اجى وجابلها قميص احمد وحلفلها يمين انو كل نقطة دم سالت من احمد براس عشر جنود صهاينه .
غاب زريف الطول فترة منيحة لحد قبل اربع تيام , كانت هاي المرة اول مرة الناس بشوفوه بهالحالة , كان هالمرّة مبين عليه التعب ولو انو كان يكابر , مهو طبيعي يتعب بعد اكثر من سبعين سنه والبندقية ما نزلت عن كتافو , الناس كانت حاسه فيه وحاسه بتعبو , كان قاعد على حجر كبير اول طريق بيارة ابو نمر من الجهة القبلية للقرية , كان يادوبو لسه واصل من مشوار بهد الحيل ولما سئلوه ختيارية القرية عن حالو وعن التعب اللي مبين على وجهو, قال الهم يا جماعة انا مش تعبان من مقارعة اولاد هالكلب الصهاينه, ايدي اخذت عالبواريد والرصاص وقتلت منهم الكثير ومستعد اظل اقاتل فيهم لحد ما يطلع اخر مجرم منهم من ارضنا , انا اللي هد حيلي الخونه العرب , طول عمرنا بنحارب الصهاينه والعرب كانو يا ساكتين يا نايمين وكافيينا من خيرهم ومن شرهم , أما انو يصفّو مع العدو ضدنا شو عمللنالهم وليش صارو بصف الصهاينه ضدنا وهم عارفين انو احنا اللي بنحارب عنهم وعن اقصانا وعن كرامتنا وكرامتهم , اللي هدني كمان انهم باعونا للمناجيس بالرخص , زريف كان يحكي وعينو دامعة من القهر والحزن عاللي بعملوه العرب فينا من مؤامرات وخيانات ما كانت تخطر عبال ابليس نفسو, قاللهم مين كان يصدق انو ترامب يذلهم هالمذله وهمي عارفين انو عزّتهم فينا وقوتهم بالايدين المتكاتفة والممدودة لبعض , معقول ترامب يستعبدهم هيك ويشخر وينتر فيهم تقول خرفان بحوش الدار,شو اللي جرى وشو اللي صار يا جماعة الخير , شو صار بالدنيا اللي تخلي حكامنا يفرشو للصهاينه عواصمهم بالورد وتستقبلهم البحرين اللي من ايام ادم وحوا وهيه عربية الدم والروح.
وقف زريف ع حيلو وسلم عليهم وقاللهم انو عندو مشوار صغير ووعدهم يرجع اقرب وقت , ابراهيم ابن ياسر الطوباسي قللو خذني معك يا زريف الطول انا بدي احارب معك ,لف وجهو زريف عالولد وحضنو وقاللو ,بكرة ان شالله بجي دورك يا ابراهيم وبتصير زريف فلسطيني ورح اعطيك الراية كمان تحملها وبعرف انك بطل ورح اتدير بالك عليها عشانك سبع زي اخوتك كلهم , بس هسه في شوية خون وعملاء رايح اقرط جوزاتهم عشان ما يعطلوك عن محاربة الصهاينه لحد ما تتحرر فلسطين , يا ابراهيم طريقنا اسهل من الطريق اللي انتو حتمشوه , احنا من سبعين سنه يا ابراهيم بنحارب بعدوّ واحد هسع صار بدل العدوّ عشرين .
راح زريف وترك زلام القرية عيونهم متمسمرة عالطريق لحد ما اختفى . ابراهيم طمّل عالارض مطرح ما كان واقف الزريف وتناول فشكة وقعت من الزريف , والله العليم انو الزريف بالعامد تركها لابراهيم , شد الصبي عالفشكة بديه الثنتين وصار يحلم بزناد وبارودة وسِنجة.

انشر على :

5 thoughts on “زريف الطول اللي قرط جوزة الخونة!

  1. زريف الطول في كل بيت فلسطيني موجود بقاتل عن العرب وبحفظ كرامتهم بالوقت اللي بخونونا فيه هالكلاب

  2. زريف امل للشعلَب الفلسطيني.. تراث نقلوه لنا اجدادنا ليبثو العزيمه على مواصلهزالنضال ضد المحتل.. سلم قلمك ايها الكاتب

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *